Google+ Badge

Wednesday, 9 April 2014

നൃത്തശാല

എല്ലാ മരങ്ങളും അവയുടെ
എല്ലാ ഇലകളും പൊഴിക്കുന്ന കാലം.
നിസ്സഹായതയുടെ പര്യായങ്ങൾ പോലെ
നഗ്നങ്ങളായ ശാഖകൾ മുകളിലേക്കുയർത്തി
മൂക പ്രാർഥനയിൽ മുഴുകി നില്ക്കുന്ന
വഴി മരങ്ങളുടെ ഇടയിലെ
ഇല വീണ് പരവതാനിയായ
നിരത്തുകളിൽ തണുപ്പുകാലത്തിന്റെ
വരവ് വിളിച്ചറിയിക്കുന്ന നേർത്ത
മൂടൽമഞ്ഞ് പുൽപ്പരപ്പിനെ
ആശ്ലേഷിച്ചു കിടക്കുന്നു.
സ്വർണ്ണതകിട്പൊതിഞ്ഞ
 മലനിരകൾക്കിടയിലൂടെ
വെയിലിന്റെ നൃത്തശാലയിലേക്ക്
കുന്നു കയറിവരുന്നു ബാലസൂര്യൻ.
കാട്ടു തീ പടർന്നത് പോലെ
പുലരിയുടെ ആകാശത്തിൽ പ്രൗഡമായ്
തിടംവച്ച് പൂർണ്ണ സൂര്യൻ.